«Snow Leopard Fund» қоғамдық қорының директоры Олег Логиновтың айтуынша, барысты фотокамералар Таулы Алтайдың Чихачев жотасында монғол шекарасы жанында түсіріп алған. Бұл Алтай жабайы табиғатында сирек кездесетін хайуанның тарихтағы алғашқы кадры екен.

«Фотоқақпандарға түскен әрбір хайуанды денесіндегі жолақтары арқылы ажыратып, онда қаншауы барын анықтауға болады. Қатон Қарағай мемлекеттік үлттық табиғи қорық инспекторлары қақпанмен жұмыс істеудің алғашқы семинарын өткізді. Жақында «Қарлы барыс өмірінің фотокезеңдері» атты байқауға да қатыспақ», - деді О.Логинов.

Бұған дейін Алтай инспекторлары қар барысын тек олар қалдырған із арқылы анықтап отырған екен. Енді арнайы сатып алынған 22 қондырғы жабайы аңдарды қиындықсыз бақылап отырады. Қор директорының айтуынша, камералар қар барысының санын, олардың жынысы мен жасын анықтай алады.

Айта кетейік, қар барысы Орталық Азиядағы тауларда, Солтүстік Үндістан, Пәкістан, Байкал, Тибет өңірлерін мекендейтін мысық тұқымдас жыртқыш аң. Түсі көк сұр, теңбіл шұбар, сақина тәрізді дөңгелек қара дақтары бар, жүні ұзын әрі қалың. Қазақстан мен Орталық Азияның биік тауларында (2000 м-ден астам) кездеседі. Қызыл кітапқа енгізілген барыстың саны жүз сексен-екі жүздей ғана.